Cangkringan, 7/3/2024 — Kanggo mèngêti ari dumadiné Daerah Istiméwa Yogyakarta (DIY) taun 2024 SMK Negeri 1 Cangkringan nganakaké Sayêmbara Nyêkar Macapat lan Maos Gêguritan kang diiloni déning para siswa kêlas X lan XI kabèh jurusan, yaiku APHP, ATR, APL, lan TKRO. Sayêmbara kalêksanakaké dina Kêmis (7/3/2024) sapurnané kridha kirab agung karana sayêmbara iki lumêbu ing rêrangkèn Kirab Budaya mèngêti Ari Dumadiné Daerah Istiméwa Yogyakarta mau. Sayêmbara Nyêkar Macapat lan Maos Gêguritan mapan ing sawijining panggung sakidulé Mêsjid Ibnu Hayyan duwèké SMKN 1 Cangkringan saka pukul 10.00 têkané 12.00 awan. Cacahé pasarta sabên jinis sayêmbara ana rongpuluh (20), yèku Sayêmbara Nyêkar Macapat 10 siswa lan Sayêmbara Maos Gêguritan 10 siswa. Para pasarta kumudu nindakaké nyêkar lan maos têmbang lan gêguritan kang wus ditêmtokaké déning panitiya kanthi téma “sinau lan ngudi ngèlmu” jumbuh klawan gêgolongan ngèlmu kang samya diudi ing SMKN 1 Cangkringan.
Laras karo ngêndikané Ibu Sasanawati, S.S. (Dwija Basa Jawa) minangka paraga kang ngêsuhi anané sayêmbara, Panjênêngané mratélakaké manawa têmbang macapat lan gêguritan kang kasêkaraké lan kawaca déning para pasarta ngêmu pasinaon utama lan duwé sambung rapêt kênthel karo wawasan ing patang (4) jurusan kang mungguh ing SMKN 1 Cangkringan. Pasinaon iku kayata bab olahan panganan cêmplon lan jênang sumsum, sabun, rodha, sarta sato kéwan ingon-ingon, sarta gêgambaran pêngalamané pra siswa kalané mangkat sêkolah, bungah lan susahé. Sakliyané supaya para pasarta gêlêm nyinaoni maneka wawasan magêpokan karo jurusané dhéwé-dhéwe, tujuwan dianakaké sayêmbara yaiku kanggo ngélingaké lan nuwuhaké rasa trêsnané para siswa marang sastra lan budaya Jawa. Pangandikané panitiya sayêmbara iki disêngkuyung katrangan saka Bapa Arif Hidayatulloh, S.Pd., minangka Wakil Kepala Sêkolah urusan Kêsiswaan, yèn ta anané sayêmbara sastra lan budaya Jawa pancèn bisa nuwuhaké lan ningkataké rasa trêsnané para siswa marang budayané dhéwé. Para siswa kaajab tansah tumêmên nggladhi lan nggunakaké basa Jawa utamané krama ing sabên dinané. Bapa Arif rumangsa mongkog déné pra siswa SMKN 1 Cangkringan isih grêngsêng anggoné nggunakaké basa Jawa rikala nyêlathu marang kanca-kancané lan matur nganggo basa krama alus marang guruné.
Kairingan ungêlé gangsa kang tinabuh dening para dwija lan siswa-siswi SMKN 1 Cangkringan, titi laksana sayembara lumaku kanthi rancag nir ing rubéda. Sabên-sabên pasarta maju ing ngarêping panggung sapêrlu nandangi karya. Ing lingiring sayêmbara, para pambiji iya Bapa Henricus Totok Yulianto, S.TP., M.P. (Pambiji Sayembara Nyekar Macapat) lan Fitriana Ebtasari, S.Pd. (Pambiji Sayembara Maos Geguritan) paring panyaruwé katujokaké marang para pasarta kabèh yèn anggoné para siswa mupu sayêmbara kurang samêkta lan gladhèn, sarta maksih sisip nglarasaké lan macakaké têmbung-têmbung ing gêguritan. Tata cara mocapaké têtêmbungan uga katon durung pênêr, kayata rikala para pasarta mocapaké fonèm [d] lan [dh] utawa [t] lan [th].
Ndilalah lakuné sayêmbara karawuhan lan kapirsanan déning Bernardus Sunardi, S.S., M.Ec.Dev minangka wakil saka Balai Pêndidikan Mênêngah Kabupatèn Sléman. Panjênêngané lan Kepala SMKN 1 Cangkringan Bapa Margono, S.Pd. kêrsa nylirani paring bêbungah marang para pasarta kang sasab dadi jawara Nyêkar Macapat, yaiku: 1) Dika Ardian Saputra; kelas XI APHP 4, 2) Muhammad Pandu Satria Wibawa; kelas XI APHP2, 3) Rafael Prasna Weka Nirbana; kelas XI APHP 3, sarta Sayêmbara Maos Geguritan, yaiku: 1) Aurellia Mirabel Aradhana; kelas XI APL 1, 2) Muhammad Dharmajati Bima Saputra; kelas XI APL 2, 3) Yunisa Putri Fadellia, kelas XI APHP 2.
(WW)